يوميات

اسمي ضمن قائمة الحجاج الليبيين هذا العام !!


https://i2.wp.com/www.tohajj.com/images/album/large/haram/haram2.gif

.

اليوم .. الساعة 11:27 صباحاً !

– دق دق دق !!

– هااااااااااااوم .. ايوه !!

– مبارك مبارك يا حاج أحمد .. ( .. جزء من النص مفقود .. ) !!؟

– طلع ؟؟ كويس !! منتاز !! لا عادي مافيش مشكلة خخخخخخخخخ !!

..

الساعة طناش وربع !

يا فتاح يا عليم يا رزاق يا كريم !!

استيقظت أخيرا وغادرت حجرتي ، وعلى وجهي علامات الحيوية والنشاط مع تقطيبة تدل على الخطورة .

– ان شاء الله خير ؟ فيه حد دق عليا ؟

مزال راقد لتوا ؟ شنو امالا ما سمعتش ان اسمك طلع في قرعة الحجاج ؟!

..

.

قبل عدة أيام .. !

.

الساعة (..) لا تهم .. فهي مبكرة/متأخرة حسب توقيت السائل/النائم !

يا أحمد نبي جواز سفرك ( .. جزء من النص مفقود .. ) .. حَنتك (1) ( .. جزء من النص مفقود ) ..

الجواز في دولابي .. الدرجة الفوقية .. ع اليسار .. تلقاه بين زوز روايات (2)!!

ان شاء الله ال ( جزء من النص مفقود ) .. !!

هممممم ال هممم !

.

أخيراً استوعبت الموقف cool !!

.

– آآه .. شكلها نادت(3) يا أمي !! مش قلتلك بنمشوا ان شاء الله السنة هدي للحجاج ؟

( أمي تضحك حتى تدمع عيناها فهي تعلم أنني سمعت بالموضوع قبل دقائق) .

– خوك ابراهيم من بدري يتصل بيك ؟ شنو امالا راقد ؟

– لا لا .. راقد شنو .. ت حتى الجواز لما خداه مني كنت نايض راهو .. لا نادت خلاص | !!

– الوو السلام عليكم يا شيخ !!

– وعليكم السلام ورحمة الله .. مبارك مبارك يا حاج حمد .. من بدري واني نتصل بيك بيش نبشرك لكن الباين راقـ ( هممم هناك فعلا 6 مكالمات لم يرد عليها ) .. !!

– لا نادت يا شيخ خلاص .. اني عارفها :mrgreen: .. شنو كملت الاجراءات والا مزال ؟

– ( ابراهيم وهو يضحك ) ياودي ما شاء الله كان غير تعطيني من وسعت بالك شوية !!

( أحمد يتحدث بثقة وقد صدق أن باله واسع ) … (لكن هذه محادثة شخصية لا يفترض نشرها هنا .. هئ هئ )

الخلاصة :

( تحديث )  صحيفة الشمس في عددها الصادر يوم الاربعاء 10-9-2008 قالت إن عدد المتقدمين لأداء فريضة الحج وصل إلى 281534 ( من بينهم 33829 من مدينة مصراته ) . وقد أجريت قرعة اداء موسم الحج لسنوات 2008-2009-2010 يوم أمس الثلاثاء بحيث تم اختيار 7 آلاف حاج لكل سنة من كافة مناطق ليبيا .

سجل أبي وأمي واخوتي والعديد من أقاربنا ، لكن الرجل المحظوظ سجل في القرعة وهو نائم وسمع بخبر ظهور اسمه بين 281 ألف تقدم ( بعد أن سُجل اسمه كمرافق لجدته ) وهو نائم أيضاً :mrgreen: .

ولأن جدتي سبق أن قامت بفريضة الحج تنازلت لابنها ( أبي ) ليذهب مكانها . أبي أخبرني أنه حين شاهد الزحام الشديد في مكان إجراء القرعة وسمع أنها ستجرى لثلاث مواسم قادمة ، ترك المكان وتوضأ وصلي ركعتين ليفاجئ بالتهاني بعد عودته !

..

(1) حَـنّة ( بفتح الحاء وتشديد النون تعني جدة حسب اللغة المصراتية ) .

(2) لسوء حظ الشيخ الجواز كان بين روايتي شيفرة دافنشي و الحب في زمن الكوليرا ( فلندعو الله ألا يكون قد تصفح هذه أو تلك 😐 ) .

(3) نادت ( عبارة تقليدية يقصد بها أن الكعبة تنادي على من قدر الله له الذهاب الحج .. كي يزورها )

الثلاثاء 2008.9.9

Advertisements

9 thoughts on “اسمي ضمن قائمة الحجاج الليبيين هذا العام !!”

  1. أقسم أني فرحتلك من الأعماق يا أحمد ..

    مبارك عليك وعلى الوالد إن شاء الله وتمشوا وإتجوا بالسلامة ودعواتكم بالله في الأراضي المقدسة ..

    هيء هيء الحاج أحمد في الجديد

  2. مبروووك الحج و إن شاء الله ذنب مغفور و ترجع من غادي كما ولدتك أمك ..

    لاكن أستنى شويه مش قتلي مش أنت ؟ القرعة طلعت لبوك و أمك ؟

    يالله مش مشكله حتى بوك و أمك مش خصاره فيهم هاهاها مع أن الواحد يتمناها لروحه بس حتى الاب و الام زي نفسك بالظبط

    يمشو و يجو بالسلامه يااارب

  3. مبروك يا أحمد و بارك لابيك وأمك بالنيابة عني وسلملي على مصراتة وأهلها أنا لدي الكثير من الاصحاب هناك.
    على فكرة أنا دخلت القرعة لكن للاسف مانادتش,وعلقت على الموضوع في مدونتي,يمكنك زيارتها والتعليق عليها……
    سلامات

  4. @ ( منير ) : الله يبارك فيك .. لكن فيه استدراك مهم ، السنة هدي اللي يمشوا للحج زوز بس ( بدون مرافق ) وهذا يعني اللي بيمشوا بوي وأمي بس .. ومع هذا فرحان جداً .. لان ليهم سنين يراجوا !

    @ ( أنس ) : القرعة يا أنس طلعت لي أني وحنتي ( مش لبوي وأمي ) .. لكن لأسباب صحية ولانها حجت قبل تتنازلت – الجدة – عن الحجة لولدها ! .. وزي ما قلت حب الأب والأم زي نفسك ( بالزبط ) :mrgreen:

    @ ( أيمن ) : جزاك الله خيراً يا أيمن .. وأسأل الله أن تكون من زوار بيته الحرام عما قريب ..

  5. @ ( عبد اللطيف ) : الله يبارك فيك يا خوي عبد اللطيف، وسلامك وصل لأهل مصراته فرداً فرداً 😛 ، وبخصوص القرعة مش عارف الآلية بالزبط .. لكن المفروض اللي حاج قبل ما يخشش في القرعة .. ويفترض فيه أولوية للكبار في السن .. ومراعاة ان الحالة الصحية لبعض الحجاج تحتم أن يكون معهم مرافق !

    إن شاء الله تنادي عليك يا عبد اللطيف .. وبالتوفيق لشجرة الزيتون 🙂

    @ ( الجبالي ) : الله يبارك فيك .. وعقبال ما نقولوك يا حاج عبيدة ( بضم العين ) :mrgreen:

  6. والله فرحتلك من كل قلبي ويا رب يطعمنى زورة البيت الحرام كيف ما انكتبت لك

    ورغم انها جت متاخر لكن احسن من بلاش ..

    والاهم من هذا كله ادعيلنا غادي

    وان شاء الله ربي يوفقك

    الف سلامة وخلي بالك من حناك

  7. الله يبارك فيك أختي بنغازية 🙂
    لكن من جديد نذكر ان اللي بيمشوا للحج بوي وأمي (بس) !
    ربي يوفق الجميع .. وعقبالكم إن شاء الله ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s